सलमान खानच्या घरावर गोळीबार होतानाचं सीसीटीव्ही फुटेज समोर, व्हिडिओ व्हायरल ( Salman Khan House CCTV Footage)

वांद्रे येथील गॅलेक्सी अपार्टमेंटबाहेर पहाटे ५ वाजण्याच्या सुमारास दोघांनी चार वेळा गोळीबार करून पळ काढला. वांद्रे पोलिस अधिकाऱ्याने दिलेल्या माहितीनुसार, आयपीसीच्या कलम ३०७ अंतर्गत अज्ञात व्यक्तींविरुद्ध एफआयआर दाखल करण्यात आला आहे. घराबाहेर गोळीबार करणाऱ्यांचे सीसीटीव्ही फुटेजही समोर आले आहे, ज्यामध्ये दोन दुचाकीस्वार गोळीबार करुन तेथून निघून जातात.

दिल्ली पोलिसांच्या एका अधिकृत सूत्राने सांगितले की, या दोघांपैकी एक गुरुग्रामचा गुन्हेगार असल्याचा संशय आहे. तसेच तो हरियाणातील अनेक खून आणि दरोड्यात सामील होता. मार्चमध्ये गुरुग्रामयेथील व्यापारी सचिन मुंजाल यांच्या हत्येतही त्याचा हात असल्याचे म्हटले जाते.

विदेशी गुंड रोहित गोदाराने एका कथित सोशल मीडिया पोस्टमध्ये मुंजालच्या हत्येची जबाबदारी स्वीकारली होती. तो गँगस्टर लॉरेन्स बिश्नोई, त्याचा भाऊ अनमोल आणि गोल्डी ब्रार यांचा जवळचा सहकारी आहे. रविवारी सलमान खानच्या घराबाहेर गोळीबार झाल्यानंतर काही तासांनंतर, अनमोल बिश्नोईने ऑनलाइन पोस्टमध्ये या घटनेची जबाबदारी स्वीकारली आणि हा ट्रेलर असल्याचे सांगून बॉलीवूड अभिनेत्याला इशारा दिला, असे पोलीस सूत्रांनी सांगितले.

गेल्या वर्षी मार्चमध्ये सलमान खानला त्याच्या ऑफिसमध्ये धमकीचा ई-मेल आला होता, त्यानंतर मुंबई पोलिसांनी लॉरेन्स बिश्नोई, गोल्डी ब्रार आणि अन्य एका व्यक्तीविरुद्ध आयपीसीच्या कलम १२० -बी, ५०६-II अंतर्गत एफआयआर नोंदवला होता. प्रशांत गुंजाळकर नावाच्या व्यक्तीने वांद्रे पोलिस स्टेशनमध्ये एफआयआर दाखल केला होता.